ՀՀ առևտրաարդյունաբերական պալատի և Հայաստանում ԱՄՆ–ի դեսպանատան համատեղ կազմակերպած սեմինարը վերաբերում էր ԱՄՆ արտահանումների արտոնությունների  GSP+  համակարգին, որում ներառված են 129 երկիր՝ այդ թվում Հայաստանը։
 «Արտոնությունների ընդհանրացված և համալրված համակարգ»-ը (GSP+) հնարավորություն է տալիս համակարգից օգտվող երկրներին տեղական ծագման շուրջ 6400 ապրանքատեսակ արտաքին շուկա արտահանել զրոյական կամ նվազեցված մաքսատուրքերով։ Վերջինս հնարավորություն է տալիս հայկական ծագման մի շարք ապրանքատեսակներ մասնավորապես ամերիկյան շուկա արտահանել զրոյական կամ նվազեցված մաքսատուրքերով։
2010 թվականից ԱՄՆ կառավարության կողմից դադարեցվել էր GSP համակարգի միջոցով արտոնությունների տրամադրումը, որը սակայն վերականգնվել է 2011 թվականին։ Նշված ժամանակաշրջանում ԱՄՆ շուկա արտահանված ապրանքների համար նախատեսված է փոխհատուցում տրամադրվող արտոնությունների չափով։ Այդ ամենը ԱՄՆ արտահանող հայաստանյան գործարարներին հանգամանորեն ներկայացրեցին, փոխհատուցման գործընթացը պարզաբանեցին և առանձին տարակարծություններ հստակեցրին  դեսպանատան տնտեսական բաժնի մասնագետները։ ՀՀ առևտրաարդյունաբերական պալատի գործադիր տնօրեն Արայիկ Վարդանյանը վստահեցրեց, որ անհրաժեշտության դեպքում Պալատը պատրաստ է նման սեմինարներ պարբերաբար կազմակերպել և աջակցել արտահանման գործընթացին։